Bergara trantsizio energetikoaren bidean aurrera pauso garrantzitsuak ematen ari da, Berener tokiko energia komunitateari esker. Azken hilabeteotan, Berenerrek bi hitzarmen estrategiko sinatu ditu, bata Bergarako Udalarekin eta bestea Fagor Kooperatibarekin, herrian energia berriztagarrien sustapena eta tokiko kontsumoa bultzatzeko helburuarekin.

Hitzarmen horiek Berenerren sendotzea eta bere jarduera eremua zabaltzea ahalbidetuko dute. Udalarekin sinatutako akordioari esker San Martin herri eskolako teilatuan instalazio fotovoltaikoak jartzea erraztuko da, energia komunitatearen sorrera puntuak abian jarriz eta herritarrengana iritsiz. Hitzarmen horrek, hurrengo urteetarako Udala eta Energia komunitatearen arteko elkarlana bermatuko du.

Fagor Kooperatibarekin adostutako hitzarmenak hastapenetan dauden proiektuak martxan jartzen lagunduko du; izan ere, Fagor taldeak Berenerreko kapitalean ekarpena egingo du eta bazkide laguntzaile bezala gehituko da proiektura.

Akordio horiek Bergarako energia burujabetzaren aldeko urrats sendoak dira. Herrian bertan energia sortuz eta kontsumituz, ingurumen inpaktua murrizteaz gain, onura ekonomikoak ere sortuko ditu. Berenerren helburua argia da: hurbileko energia berriztagarria herritarren esku jarriz, trantsizio energetikoa modu justu eta parte-hartzailean egitea.

Hitzarmenok bide berriak irekitzen dituzte Bergarako herritarrentzat etorkizun jasangarriago bat eraikitzeko elkarlanaren garrantzia azpimarratuz.